Java e 24-të në elitën e futbollit kosovar do të vazhdojë me dy ndeshje ditën e shtunë.
Në ndeshjet hapëse të kësaj jave triumfuan skuadrat mysafire, pasi Drita mposhti Ferizajn në udhëtim, ndërsa Llapi tregoi forcën ndaj Lirisë në Prizren.
Gjilani sot do të jetë nikoqir i Trepçës ’89 në ndeshjen më interesante të ditës së shtunë në IPKO Superligën e Kosovës.
Vendasit në ndeshjen e fundit kanë triumfuar me rezultat 2-0 ndaj KEK-ut, ndërsa mysafirët kanë pësuar tri humbje radhazi.
Të dyja skuadrat janë në kërkim të pikëve pasi nuk janë të qeta deri në fund të edicionit për t’i shpëtuar rënies.
Ndeshja tjetër e ditës së sotme do të zhvillohet në Kastriot, mes KEK-ut dhe Drenicës.
KEK-u thuajse e rënë nga elita e futbollit kosovar po synon që me lojë të bukura t’i prishë planet skuadrave tjera.
Në anën tjetër as Drenica ende nuk e ka të sigurt qëndrimin dhe synon fitore ndaj KEK-ut për t’iu larguar zonës së ftoftë.
Të dyja takimet e sotme në IPKO Superligën e Kosovës do të zhvillohen me fillim nga ora 14:00. /Telegrafi/
