Dy mijë të vdekur në aksidente rrugore që nga paslufta

Në një tryezë të organizuar nga kolegji “Tempulli” është folur rreth numrit të madh të aksidenteve me fatalitet, ndërsa u bë e ditur se nga paslufta rreth dy mijë persona kanë humbur jetën në aksidente trafiku.

Drejtori i këtij kolegji, Muhamed Krasniqi, ka përmendur aksidentet, me theks të veçantë gjatë stinës së verës.

“Shikuar në përgjithësi në statistika veç pas lufte i kemi diku 2 mijë të vrarë në aksidente rrugore, janë rrethana paqe e jo lufte. Ky numër i statistikave na dërgon në një rrafsh tjetër ku është ekuivalent me një shtet në gjendje lufte”, tha Krasniqi.

Ministri i Punëve të Brendshme, Bejtush Gashi vuri në dukje se me qëllim të parandalimit të aksidenteve në trafikun rrugor dhe ngritjes së sigurisë në trafikun rrugor, Policia e Kosovës ka realizuar shumë aktivitete.

Drejtori i Divizionit të komunikacionit rrugor në Policinë e Kosovës, Sabedin Mehmeti, tha se pas marrjes së detyrës ka bërë analiza për aksidente prej vitit 2002.

“Përafërsisht numri mesatar prej vitit 2002 deri në vitin 2017 është 15,564 aksidente në vit, që është numër bajagi i madh për 10.800 km/katrorë e për 1 milion e 700 mijë banorë popullatë”,  tha ai.

Tutje ai u shpreh se 123 aksidente me fatalitet është numri mesatar në vit, që nga viti 2005 deri në 2017, ndërsa numri i të vdekurve 143.

Ai shtoi se numri mesatar i gjobave është 800–1000 në ditë, dhe se numri i tyre vetëm është rritur nga viti në vit.

Nënkryetari i komunës së Prishtinës, Selim Pacolli tha se ajo çka po vërehet më së shumti në Prishtinë është mungesa e sinjalizimit të duhur në komunikacion.

“Shpesh herë flitet për aksidentet me fatalitet të cilat janë shqetësuese, normal dihet që në nivel Kosove kemi pas edhe humbje të familjeve të tëra, siç ishte rasti i Suharekës. Ajo çfarë më së shumti diskutohet brenda komunës së Prishtinës është mungesa e sinjalizimit të duhur në komunikacion…”, tha ai.