“Dritarja për investime të diasporës”, Kurti: U mundëson mërgimtarëve që duan të investojnë të aplikojnë për kredi deri në tre milionë euro

Kryeministri i e vendit, Albin Kurti ka bërë të ditur se bashkatdhetarët që duan të investojnë në Kosovë mund të marrin kredi në bankat e Kosovës deri në tre milionë euro, ndërsa Fondi Kosovar për Garanci Kreditore do të ofrojë garanci për kreditë deri në dy milionë euro.

Kurti në një postim në Facebook shkruan se Kosova i mirëpret bashkatdhetarët që vijnë për pushime dhe ata që duan të investojnë.

Lexoni të plotë postimin:

Për bashkatdhetarët tanë që po vijnë për pushime në Kosovë e që duan të kthehen në vendlindje, përveç dyerve që i kanë të hapura, nga muaji korrik kemi hapur edhe Dritaren për Investime të Diasporës.

Përmes saj do të garantojmë huat e bizneseve me pronarë nga mërgata që duan të investojnë në Kosovë. Ajo është zgjidhja ndaj vështirësive që mërgata jonë ndërmarrëse ka pasur deri më tani në qasjen në financim në bankat e vendeve ku ata jetojnë, por edhe në bankat tona në mungesë të historikut kreditor.

Dritarja për Investime të Diasporës u mundëson atyre që të aplikojnë për kredi deri në tre milionë euro nëpër bankat e Kosovës dhe pjesëmarrja e tyre me kapital duhet të jetë së paku 20%. Pas aplikimit dhe nëse përmbushen të gjitha kriteret, Fondi Kosovar për Garanci Kreditore do të ofrojë garanci për kreditë deri në dy milionë euro.

Vendi ju pret. Kosova ju mirëpret. /Telegrafi/