Drejtoria e shëndetësisë në Ferizaj gjatë 2024-s finalizon një varg projektesh kapitale

Gjatë vitit 2024 drejtoria e shëndetësisë dhe mirëqenies sociale në Ferizaj ka realizuar një varg projekte e aktivitetesh kapitale me qëllim të përmirësimit të shërbimeve shëndetësore për qytetarët.

Drejtori i kësaj drejtorie, Kemajl Emini, në një intervistë për telegrafin, ka thënë se viti i kaluar ishte i suksesshëm për shëndetësinë ferizajase me arsyetimin se kanë vazhduar investimet kapitale nëpër objekte shëndetësore.

“Vazhduam me investimet kapitale në objektivin e QKMF-së në bashkëpunim me Ministrinë e Shëndetësisë. Në të njëjtën kohë jemi në bashkëbisedim me AQH-në për inventar për këtë objekt, pastaj vazhduan njëkohësisht edhe ndërtimet në kuadër të qendrës kryesore numër dy, ku kemi bashkëpunim me organizatën KATAR, vlen për të potencuar se ky objekt do të pajiset komplet me inventar të ri. Përfunduam objektin e Qendrës Mjekësisë Familjare me Qëndresën Kosovare nga Kuvajti, objekt me 260 metra katrorë, me ç’rast Qëndresa Kosovare e ka kontribuar edhe me një automollantë, me laboratorë, nxemjen qendrore të objektit e të tjera. Në të njëjtën kohë kemi çuar edhe karrigen e re stomatologjike”, ka thënë Emini.

Sipas tij, në vargun e investimeve kapitale janë ndarë mjete edhe për qendrën e Koshares, një objekt me 260 metra katrorë me të gjitha pajisjet moderne.

“Gjatë vitit të kaluar kemi organizuar edhe aktivitete të ndryshme në mesin e tyre katër aktivitete të përbashkëta me qytetarë dhe me komunën e Ferizaj, Shtime, Kaçanik, Elizan dhe Viti, bashkë me Spitalin Rajral Ferizaj, me FSK-në, Policinë dhe KFOR-në Amerikan, që kishte për qëllim për përgatitje për të dhënë ndihmën e parë”, ka thënë Emini.

Sipas tij, shëndetësia primare ka një bashkëpunim të shkëlqyer edhe në Shëndetësinë Sekondare apo me spitalin rajonal Ferizaj.

“Spitalit ua kemi dhënë pesë dhoma të objektit të QKMF-së për të rregulluar një ortopedi që i korrespondon me nevojat e qytetarit të Ferizajt si dhe përmes Qëndresës Kosovare e kemi pajisur me një aparat për hemodializë”, ka shtuar ai.

Sipas Eminit gjatë 2024-s janë ballafaquar me mungesë të stafit shëndetësor derisa për shkaqe financiare nuk arritën ta vazhdojnë marrëveshjen me “Caritas”-in.

“Përmbaruesi për shkak të kontratës kolektive të arsimit i ka marrë rreth një milion euro në drejtorinë tonë dhe kjo ka shkaktuar telashe për kontratën me “Caritas”-in. Shpresojmë që muajin në vazhdim gjithsesi ta konsolidojmë, sepse nevojat janë tepër të mëdha për staf. Kontrata kolektive na ka penalizuar Komunën në përgjithësi, po edhe drejtorinë tonë afër mbi një milion euro”, ka shtuar Emini./Telegrafi/