Kuvendi i Kosovës ka nisur sot aktivitetin “Bashkatdhetarët në Kuvend”.
Me këtë rast dyert e Kuvendit janë hapur për të gjithë ata bashkatdhetarë të cilët janë të interesuar të shohin për së afërmi punën në këtë institucion, e gjithashtu të takohen edhe me deputetë.
Gjatë ditë së sotme është vërejtur interesim i madh i bashkatdhetarëve të cilët kanë ardhur për të parë nga afër punën edhe aktivitet që zhvillohen në Kuvend, ku me këtë rast ata kanë pasur mundësinë që të shohin edhe sallën ku mbahen seancat plenare.
Madje disa prej tyre kanë provuar edhe ndjesinë sesi është të ulesh në ulësen e kryeparlamentarit Glauk Konjufca, dhe atë të kryeministrit Albin Kurti, e gjithashtu edhe në ulëset e deputetëve.
Dyert e Kuvendit do të jenë të hapura sot dhe nesër nga ora 08:00 deri në orën 16:00. /Telegrafi/
