Dështojnë sërish bisedimet mes përfaqësuesve të Mbappes dhe PSG-së për kontratën e re

Kylian Mbappe do të largohet si lojtar i lirë nga Paris Saint-Germain dhe nga janari mund të bisedojë me çdo skuadër, raporton L’Equipe.

Sulmuesi francez ka kohë që nuk pajtohet me kontratën e ofruar nga skuadra parisienë dhe nuk ka të bëjë me rritje page.

Mbappe po kërkon një aventurë të re dhe tashmë është e ditur se preferenca e tij e vetme është Real Madridi.

Los Blancos ofruan rreth 170 milionë euro në verën e këtij viti, mirëpo u refuzua nga PSG, me këta të fundit që besonin se lojtari do rinovonte kontratën.

Mirëpo, as në takimin e fundit mes përfaqësuesve të Mbappes e bordit të klubit francez, nuk është arritur marrëveshje për rinovim të kontratës.

Madje, u është bërë e ditur se lojtari ka vendosur të largohet në fund të këtij edicioni, e kjo lë të nënkuptohet se bisedimet me Real Madridin mund të fillojnë nga 1 janari.

Kujtojmë se madrilenët dhe PSG do të përballen në fazën e eliminimit direkt në Ligën e Kampionëve nga muaji shkurt.

Mbappe në ato dy përballje (vajtje-ardhje), mund të luajë kundër Real Madridit si lojtar i tyre, por që duhet të pres deri në verën e vitit 2022 që të veshë fanellën. /Telegrafi/