Me dëshminë e të pandehurit Vllatko Keshishev vazhdon gjykimi për vrasjen e Vanjës dhe Pançes

Në Gjykatën Themelore Penale në Shkup sot në ora 10:00 vazhdon gjykimi për vrasjen e Vanjës dhe Pançes me dëshminë e të pandehurit Vllatko Keshishev. Në seancën e kaluar është marrë në pyetje i pandehuri Bore Videvski, i cili ka mohuar deklaratat e dhëna nga prokuroria, duke treguar se nuk ka lidhje me vrasjen e Vanjës dhe Pançes.

Paraprakisht është marrë në pyetje i pandehuri Velibor Manev, i cili ka shpjeguar në detaje rrëmbimet e Vanjës dhe Pançes, duke treguar se koordinator dhe autor i vrasjeve ishte i pandehuri Lupço Palevski. Ai ka theksuar se pas vrasjes së Pançes ka vazhduar me rrëmbimin e Vanjës për shkak të frikës dhe kërcënimeve të Palevskit ndaj tij dhe familjes së tij.

Manev theksoi se ata menduan se duhet të rrëmbejnë një grua të moshës 38-40 vjeç dhe se janë përpjekur ta ndryshojnë mendjen e Palevskit pasi kanë parë se kanë rrëmbyer një fëmijë. Ai po ashtu tha se për rrëmbimet u janë premtuar nga 150 mijë euro. Ai pohonte se babai i Vanjës, Aleksandar Gjorçevski, nuk është i përfshirë në këtë rast.

Si Manev ashtu edhe Videvski theksuan se i janë nënshtruar torturave gjatë marrjes në pyetje nga policia.

Sipas njoftimit, pas marrjes në pyetje të Keshishevit, duhet të dëshmojnë babai i Vanjës, Aleksandar Gjorçevski dhe Lupço Palevski.

Në aktakuzë thuhet se Lupço Palevski, Bore Videvski, Velibor Manev, Vlatko Keshishov dhe Aleksandar Gjorçevski, së bashku kanë planifikuar rrëmbimin e 14-vjeçares Vanja me qëllim që të detyrojnë një anëtar të familjes së saj të ngushtë të japë para për shpërblim. Rrëmbimi i të dëmtuarit, Pançe Zhezovski, në Veles, sipas aktakuzës, ka qenë me qëllim që ta detyrojë t’ua japë automjetin e tij “Citroen”, në mënyrë që ta përdorin për ta rrëmbyer fëmijën në Shkup.

Minorenja Vanja dhe Pançe nga Velesi, u raportuan të zhdukur më 27 dhe 24 nëntor, ndërsa më 3 dhjetor 2023 u gjetën të vdekur në afërsi të Shkupit dhe Velesit.