Dalic konfirmon lëndimin e dy yjeve të Kroacisë, thotë se do të bëjnë gjithçka për vendin e tretë

Kroacia do të përballet me Marokun për ndeshjen për vendin e tretë në Kupën e Botës.

Dueli për vendin e tretë do të zhvillohet me fillim nga ora 16:00 në Khalifa International Stadium në Doha të Katarit.

Trajneri i Kroacisë, Zlatko Dalic ka folur në konferencë për media, duke thënë se kanë probleme me lëndime.

Marcelo Brozovic dhe Josko Gbardiol kanë probleme dhe ende e kanë të paqartë aktivizimin për finalen e vendit të tretë.

“Kemi disa lojtarë me probleme fizike. Gvardiol ka luajtur ndeshjen e fundit me injeksione në këmbë, dhe edhe Brozovic po ka probleme. Për finalen e vendit të tretë do të hedh në fushë vetëm lojtarë që janë mirë dhe të gatshëm për të luajtur, pasi do të bëjmë gjithçka për të fituar”.

“Për momentin nuk e di nëse Brozovic do të luajë, varet nga muskujt e tij, pasi ka dhimbje”, tha Dalic.

Tutje trajneri kroat tha se është ndeshje me rëndësi dhe do të bëjnë gjithçka për ta fituar medaljen e bronztë në ‘Katar 2022’.

“Të jesh i treti apo i katërti në botë ka goxha diferencë, dhe ne duam të jemi ata që arrijmë të tretët. Do të bëjmë gjithçka për medaljen e bronztë dhe një vend në podiumin e Botërorit”, deklaroi Dalic. /Telegrafi/