Continental i Gjermanisë planifikon të pushojë nga puna 7000 punëtorë

Furnizuesi i pjesëve të automjeteve, Continental, ka njoftuar se për shkak të kërkesës së ulët do të ulë prodhimin në Gjermani duke mbyllur katër fabrika dhe duke zhvendosur një linjë prodhimi në Çeki.

Për të kursyer 400 milionë euro në vit, grupi planifikon të pushojë nga puna mbi 7000 punonjës, sipas një plani ristrukturimi që ka qenë në përpunim për më shumë se një vit.

Sot, kompania ka raportuar se do të mbyllë fabrikat në Bad Blankenburg, Stolzenau dhe Moers, si dhe kompleksin e bashkuar në Frohburg dhe Geithain.

Lexo po ashtu Sa mund të ulet jetëgjatësia e gomave nëse ato nuk janë të fryra sa duhet?

Deri në mesin e këtij viti, një linjë prodhimi nga fabrika në Hannover-Vahrenwald do të zhvendoset në Çeki. Po ashtu, prodhimi në fabrikën në Hamburg do të reduktohet.

“Trendet në zhvillimin e industrisë së automobilave dhe në sektorin e nxjerrjes së linjitit në Evropë po na sjellin sfida”, deklaroi anëtari i bordit ekzekutiv të Continental dhe kreu i departamentit ContiTech, Philip Nelles.

Reduktimi i prodhimit në Gjermani do të ndikojë gjithsej 580 punonjës, sipas deklaratës së kompanisë, shkruan dpa.

Në muajin nëntor, revista gjermane Manager Magazin raportoi se Continental planifikon të eliminojë rreth 5500 vende pune në mbarë botën, që përfaqëson gati 3 për qind të fuqisë punëtore të saj.

Lexo po ashtu Teknologji e re: Gomat zbulojnë dhe frenojnë në rrugë të rrëshqitshme

Menaxhmenti planifikon të shkurtojë kryesisht pozicionet administrative, ndërsa vendet e punës në prodhim dhe zhvillim për momentin nuk do të preken.

“Po shqyrtojmë masa shtesë për të forcuar konkurrencën në sektorin e automobilave, duke përfshirë ndryshime të mundshme në strukturën administrative, për të siguruar kushte për vendimmarrje më të shpejtë dhe më fleksibël”, tha kreu i divizionit ekzekutiv, Philipp von Hirschheydt, duke shtuar se nuk mund të konfirmojë nëse vendimi tashmë është marrë.

Kompani të shumta automobilistike në mbarë Evropën po mbyllin fabrika dhe po pushojnë punonjës për shkak të kërkesës së ulët, kostove të larta dhe konkurrencës nga Kina. /Telegrafi/