Chaczapuri, një pjatë tradicionale gjeorgjiane

Përbërësit:
* 200 gr miell
* 15 gr maja birre
* 1 vezë
* 100 ml qumësht (të nxehtë)
* 150 gr djathë gjeorgjian (ose gjizë pa kripë)
* 1 lugë gjelle vaj ulliri
* pak gjalpë
* pak kripë

Përgatitja e brumit
Marrim miellin dhe e vendosim në një enë. Pastaj i hedhim majanë, vezën, vajin dhe qumështin. I përziejmë mirë të gjithë përbërësit. Nëse e shohim të nevojshme shtojmë përsëri qumësht nëse brumi është i thatë. Bëjmë brumin derisa të gjithë përbërësit të jenë përzier mirë dhe të arrijmë një masë homogjene. Brumin e vendosim në një vend të ngrohtë, të mbuluar me një pecetë dhe e lemë të paktën 2 orë që të pushojë.

Djathi
Në vend të djathit gjeorgjian, ju mund ta zëvendësoni atë me gjizë pa kripë. Gjithashtu nëse dëshironi mund të përdorni dhe djathë kaçkavall të butë me të paktën 45% yndyrë. Sipas dëshirës mund të shtohet dhe pak mozzarella.

Përgatitja e chaczapurit

E marrin brumin dhe e hapim petë të trashë, jo shumë të madhe. Në mes të brumit vendosim djathin dhe e mbyllim siç është ilustruar në foto.
Brumi tani ka një formë topi dhe këtë me kujdes e hapim me okllai. E vendosim në një tavë të lyer pak me gjalpë.

E vendosim në furrë për 15-20 minuta, 180 gradë. Në fund fare e lyejmë pak chaczapurin me gjalpë edhe mund ti hedhim edhe pak djathë të grirë sipër sipas dëshirës.