Çfarë mendojnë ukrainasit për përplasjen Trump-Zelensky?

Ukrainasit kanë deklaruar se ata ende e mbështesin Volodymyr Zelenskyn në vazhdën e grindjes së tij me Donald Trump.

Volodymyr Zelensky kishte udhëtuar në Uashington teksa do të arrinte një marrëveshje për mineralet me SHBA-në, por ai u largua pas një debati të nxehtë në Zyrën Ovale.

Nën vëzhgimin e mediave botërore, dhjetë minutat e fundit të takimit kaluan në momente tensioni, pasi si Trump ashtu edhe zëvendësi i tij, JD Vance, akuzuan Zelenskyn si “mosmirënjohës”.

Trump e quajti Zelenskyn si “mosrespektues”, ndërsa udhëheqësi ukrainas u përpoq të mbrohej.

Por, qytetarët e Kievit thanë se qëndrojnë pranë presidentit të tyre – pavarësisht thirrjeve nga SHBA që ai të tërhiqet dhe të mbajë zgjedhje.

Nikita, 30 vjeç, tha: “Ai është presidenti, ne e zgjodhëm atë. Kështu që ne i besojmë atij”.

Nikita tha se ka besim në qeverisjen e kombit të tij, shkruan skynews, përcjell Telegrafi.

“Por nuk kam besim se çfarë do të ndodhë më pas”, shtoi ai.

“Unë me të vërtetë shpresoj se Evropa do të zgjohet dhe ndoshta do të zëvendësojë mbështetjen e SHBA-së”, përfundoi ukrainasi.

Ai foli në qendër të qytetit, teksa shtynte në karrocë fëmijën e tij shtatë muajsh.

Lexo po ashtu Pas 'përplasjes' me Trumpin, Zelensky në një takim me kryeministrin britanik

Kur u pyet për të ardhmen e Ukrainës, ai tha se nëse nuk ishte i sigurt se vendi kishte një të ardhme, atëherë nuk do të kishte qëndruar.

“Ndoshta Amerika ka ndryshuar mendje”

Alla tha se ishte “shumë e zhgënjyer” nga mënyra se si biseda kishte zhvilluar.

“Ne shpresonim për paqe,” tha ajo.

Ajo tha këtë mëngjes se ndjehej sikur “gjithçka kishte ndryshuar, por ne shpresojmë për më të mirën gjithsesi”.

“Ukraina është e fortë dhe do të qëndrojë. Kjo është fuqia jonë”, shtoi ajo.

Kur u pyet për tërheqjen e mundshme të mbështetjes së SHBA-së, ajo tha: “Shpresoj se Evropa do të na ndihmojë. Dhe mendoj se ndoshta edhe Amerika ka ndryshuar mendje, sepse kam parë shumë amerikanë që thonë se u vjen keq për fjalët e Trumpit duke thënë se na vjen keq, ne nuk mendojmë kështu”.

“Presidenti ynë kishte të drejtë”

Svitlana, 52 vjeç, tha thjesht: “Presidenti ynë kishte të drejtë – ne nuk kemi zgjidhje. Sigurisht që ne duam paqe, duam një armëpushim, por Putini nuk do ta bëjë këtë”.

“Ai nuk dëshiron paqe. Ai dëshiron të vazhdojë të na shkatërrojë totalisht”, shtoi Svitlana.

Ajo tha se gjatë takimit të Zyrës Ovale, një dron sulmoi objektet mjekësore dhe objektiva të tjera në Kharkiv, qyteti i dytë më i madh i vendit, duke plagosur të paktën pesë persona.

“Kjo nuk është sjellje e njerëzve që duan paqe”, sipas saj.

Dmytro, 30 vjeç, tha se do të ishte ende e mundur të fitohej lufta pa Amerikën.

“Do të ishte e vështirë, por me ndihmën e Bashkimit Evropian, me prodhimin tonë, do të ishte e mundur”, tha ai. /Telegrafi/