Çfarë kanë të përbashkët migrena dhe endometrioza?

Sa herë që përmendet fjala “migrenë” apo “endometriozë,” shumica e njerëzve mendojnë për dy probleme të veçanta

Këto dy gjendje shpesh bashkëjetojnë, duke krijuar një realitet që shumë gra e përjetojnë, por pak e kuptojnë.

Çfarë janë migrena dhe endometrioza?

Migrena është një çrregullim neurologjik që karakterizohet nga dhimbje të forta koke, shpesh të shoqëruara me ndjeshmëri ndaj dritës dhe zhurmave, të përziera dhe dobësi. Ndërkohë, endometrioza ndodh kur indi që i ngjan shtresës së mitrës rritet jashtë saj, duke shkaktuar dhimbje të forta në zonën e legenit dhe simptoma të tjera si mestruacione të dhimbshme.

Lidhja midis dy gjendjeve

Një e përbashkët është zbuluar midis këtyre dy gjendjeve. Sipas një sondazhi të vitit 2021, 43% e grave me endometriozë vuajnë edhe nga migrena.

Megjithëse lidhja mes tyre nuk është ende plotësisht e qartë, disa teori përfshijnë:

* Hormonet: Çrregullimet hormonale mund të ndikojnë në të dyja gjendjet.
* Inflamacioni: Si migrena, ashtu edhe endometrioza lidhen me nivele të larta inflamacioni në trup.
* Gjenetika: Mundësia për trashëgimi të këtyre gjendjeve mbetet një teori e fortë.
* Ndjeshmëria e sistemit nervor qendror: Kjo mund të përkeqësojë dhimbjen në të dy rastet.

Çfarë thonë gratë që vuajnë nga të dyja gjendjet?

Histori të vërteta tregojnë përse është e vështirë të ndash simptomat e një gjendjeje nga tjetra. Paula Dumas, një aktiviste për migrenën, rrëfen se dhimbjet e kokës ishin aq të forta, sa maskuan simptomat e endometriozës deri në një pikë ku situata u bë e paanashkalueshme. Pas një histerektomie emergjente, ajo përjetoi dhimbjen më të keqe të jetës së saj: një migrenë që e kaloi nga një paciente episodike në një paciente kronike.

Pse kjo lidhje duhet diskutuar?

Heshtja ndaj këtyre çështjeve ka qenë shpesh dominuese. Endometrioza u etiketua për dekada si “sëmundja e grave karrieriste,” ndërsa migrena shpesh quhet një justifikim për pushime nga puna, citon Anabel.

Siç tha shkrimtarja e famshme Hilary Mantel: “Gratë do të vazhdojnë të vuajnë derisa të kuptojmë koston e të injoruarit të këtyre gjendjeve.” /Telegrafi/