Çështja për përjashtimin e Skënderbeut: Vetëm kërkesë për përjashtim prej 10 vitesh, ende nuk ka vendim

Skënderbeu rrezikon për 10 vite përjashtim nga kupat e Evropës.

Ky është lajmi i bujshëm i ditës, por nuk bëhet fjalë për përjashtim si fakt i kryer, sepse është vetëm kërkesa e Inspektorëve të Disiplinës dhe Etikës në UEFA.

Siç mund të lexohet në dokumentin e siguruar nga mediat shqiptar, inspektorët që veprojnë në mënyrë të pavarur dhe bëjnë rolin e prokurorit për UEFA-n, kanë përpiluar një dosje kundër Skënderbeut.

Kjo dosje i është dërguar drejtuar Organit të Disiplinës, Etikës dhe Kontrollit në UEFA:

Kërkesa është për një përjashtim të Skënderbeut për 10 vite nga kupat e Evropës dhe gjobë prej një milion euro gjobë për klubin.

Letra është firmosur nga avokati Migel Lietard Fernandez-Palasios dhe Eksperti i Basteve Karl Dhont.

Ky është vazhdimi i një procesi që ka zgjatur më tepër se dy vite nga organi i futbollit evropian për Skënderbeun.

Klubi korçar është penalizuar nga UEFA dy vite më parë me një sezon përjashtim nga aktivitetet ndërkombëtare për dyshime në implikime të ndeshjeve me rezultate të paracaktuara (kurdisje).

Për momentin ende nuk ka asnjë vendim përfundimtar rreth këtij procesi disiplinor. /Top Channel/