Cavani kërkon falje pas përdorimit të paqëllimtë të fjalës që mund të konsiderohet si raciste

Edinson Cavani ka kërkuar falje për një postim në rrjetet sociale që përmban një term në spanjisht që mund të interpretohet si ofendues, ndërsa Federata Angleze e futbollit është duke e hetuar rastin.

Sulmuesi i Manchester Unitedit kishte bërë një reagim në faqen e tij në Instagram pas fitores ndaj Southamptonit, ku ua siguroi Djajve të Kuq fitoren.

Në postimin e tij, uruguaiani e falënderonte një mik që e kishte uruar për fitoren, por me fjalët: “Gracias negrito”, një term që është referencë për racën dhe përkthehet: “Faleminderit, zezak”.

Lexo po ashtu Cavani hetohet për përdorimin e një fjale raciste, për të cilën dikur Suarez ishte suspenduar me tetë ndeshje moslojë

Derisa në vendin e tij është një shprehje miqësore, në Britaninë e Madhe mund konsiderohet si raciste, prandaj 33-vjeçari e ka fshirë postimin dhe tash ka kërkuar falje.

“Mesazhi që e postova pas ndeshjes së të dielës kishte qëllim dashamirës për të përshëndetur një mik, duke e falënderuar për urimet pas ndeshjes. Gjëja e fundit që do të doja do të ishte ofendimi i dikujt”.

“Jam kundërshtar i madh i racizmin dhe e fshiva mesazhin porsa e kuptova se mund të interpretohet ndryshe. Dëshiroj të kërkoj falje të sinqertë për këtë gjë”, ka thënë Cavani në një deklaratë.

Në bazë të politikave të reja ndëshkuese, thyerja e rregullave në rrjetet sociale ndëshkohet së paku me tri ndeshje moslojë nga Federata Angleze e Futbollit. Pritet të shihet cili do të jetë vendimi zyrtar. /Telegrafi/