Bytyqi beson në kualifikim: Kemi një plan për t’i marrë tri pikët në Izrael

Anësori i Kosovës, Zymer Bytyqi, shpreson në suksesin e skuadrës në ndeshjet kualifikuese për të zënë një vend në ‘Euro 2024’.

Gjatë ditës së hënë, Dardanët e kanë zhvilluar stërvitjen e parë në Kampin Nacional të FFK-së në Hajvali duke i nisur kështu përgatitjet për ndeshjet kualifikuese të marsit, ndaj Izraelit dhe Andorrës.

Futbollisti i Olympiacosit është zotuar se me dhënien e maksimumit, Kosova mund ta arrijë kualifikimin historik në Kampionatin e ardhshëm Evropian.

“Fillimisht jam i lumtur që sërish jemi bashkë në kombëtare. Pres që të kemi sukses dhe të mund të arrijmë në Evropian. Kemi një grup të mirë dhe besoj që nëse e japim maksimumin tonë mund ta arrijmë kualifikimin”.

Lexo po ashtu Me vullnet dhe dëshirë për objektivin historik, lojtarët e Kosovës nisin përgatitjet për kualifikueset e ‘Euro 2024’

“Ndeshja me Izraelin do të jetë shumë e vështirë, por edhe ne i kemi lojtarët e mirë dhe e kemi një plan që të shkojmë atje për t’i marrë tri pikë”.

“Jam në formë të mirë e po ashtu edhe lojtarët e tjerë që janë këtu janë në formë të mirë dhe po kalojnë mirë në klubet e veta. Shpresoj të vazhdojmë kështu”.

Lexo po ashtu Ujkani: Duhet të besojmë te kualifikimi, me mbështetjen e tifozëve do të jemi më të fortë

“Pres përkrahjen nga tifozët tanë ‘Dardanët’, pasi ata na shtyjnë të japim maksimumin tonë për t’i marrë pikët maksimale”, është shprehur Bytyqi.