Bullgaria dëbon diplomatin e Ambasadës ruse në Sofje, ishte përfshirë në aktivitete të spiunazhit

Ministria bullgare e Punëve të Jashtme ka njoftuar se ka dëbuar një tjetër diplomat rus me dyshimin për spiunazh, vetëm dy javë pasi vendi ballkanik shpalli dhjetë zyrtarë të Ambasadës ruse persona non-grata.

Sipas njoftimit të MPJ-së, ky zyrtar rus ka kryer aktivitete në kundërshtim me Konventën e Vjenës për Marrëdhënie Diplomatike.

“Ministria e Jashtme i dorëzoi një notë zyrtarit diplomatik i shpallur persona non-grata, duke i dhënë atij një afat prej 72 orësh për t’u larguar nga Bullgaria”, tha MPJ në një deklaratë.

Lexo po ashtu Bullgaria urdhëron dhjetë diplomatë rusë të largohen nga vendi

Masa pasoi pas një kërkese nga Prokuroria bullgare se diplomati – Sekretar i Parë në Ambasadën e Rusisë në Sofje – ishte “përfshirë në aktivitete të parregullta të inteligjencës” duke mbledhur “informacione të rëndësisë kombëtare”.

Kujtojmë se vitin e kaluar, Agjencia Shtetërore për Siguri Kombëtare e Bullgarisë (SANS) në bashkëpunim me Ministrinë e Punëve të Brendshme kishte kryer operacionin në shkallën më të gjerë për arrestimin e spiunëve rusë në vend, që pas përfundimit të Luftës së Dytë Botërore. /Telegrafi/