Blinken pati një takim shtatë orë e gjysmë me kryediplomatin kinez, a do të takohet me presidentin Xi Jinping?

Sekretari amerikan i Shtetit, Antony Blinken ka zhvilluar bisedimet me diplomatët e lartë të Kinës dhe mund të takohet me presidentin Xi Jinping, në ditën e fundit të një udhëtimi në Pekin që synon përmirësimin e marrëdhënieve të tensionuara.

Sipas mediave të huaja, përcjell Telegrafi, diplomati i lartë amerikan u takua për shtatë orë e gjysmë të dielën me ministrin e Jashtëm Qin Gang, më shumë se sa pritej, me të dyja palët që ranë dakord të vazhdojnë komunikimin ndërsa përpiqen të shmangin konfliktin e gjithanshëm.

Asnjëra palë nuk ka konfirmuar një takim midis Blinken dhe Xi, udhëheqësit më të fuqishëm të Kinës në dekada, takimi i të cilit me presidentin Joe Biden në nëntor në Bali ngriti “shpresa” për një shkrirje të marrëdhënieve.

Por diplomatët shohin një takim të mundshëm me Xi.

Blinken hapi ditën duke takuar kryediplomatin kinez, Wang Yi, pozicioni i të cilit në Partinë Komuniste renditet mbi ministrin e Jashtëm.

Duke u kthyer në rezidencën shtetërore të zbukuruar, ku u zhvilluan bisedimet e së dielës, Blinken dhe Wang u panë të buzëqeshur para kamerave përpara se të shkonin në një takim me ndihmësit e tyre, të cilët ndryshe nga shefat e tyre mbanin maska në përputhje me protokollet për shkak të Covid-19.

Ndryshe, tensionet janë rritur mes dy ekonomive më të mëdha të botës në vitet e fundit për çështje që variojnë nga tregtia tek teknologjia e deri në Tajvan.

Zyrtarët amerikanë thonë se nuk presin përparime të mëdha nga bisedimet e Blinken, por shpresojnë të rihapin linjat e rregullta të komunikimit për të parandaluar që fatkeqësitë të përshkallëzohen në konflikt.

Të dy vendet thanë të dielën se Qin pranoi një ofertë për të bërë një vizitë në Uashington në një datë të mëvonshme. /Telegrafi/