Bislimi pas takimit me Lajçakun: Draft-propozimi për Asociacionin nuk ishte pjesë e diskutimeve

Zëvendëskryeministri Besnik Bislimi të enjten zhvilloi takim bilateral me Përfaqësuesin Special të Bashkimit Evropian, Miroslav Lajçak.

Nga Qeveria e Kosovës përmes një komunikate për media, kanë konfirmuar se nuk ka pasur takim trilateral me kryenegociatorin e Serbisë, Petar Petkoviq.

Lexo po ashtu Bislimi pas takimeve në Bruksel: Pa nënshkrim të marrëveshjeve nuk mund të ecet drejt zbatimit

Sipas njoftimit, në takim u trajtuan tema të cilat ndërlidhen me zbatimin e Marrëveshjes Bazike të 27 shkurtit, Aneksit Implementues të 18 marsit dhe planin e ri për ecjen përpara të 21 tetorit.

“Ky ishte takimi vijues i procesit pas atij të 26 tetorit me liderët e Gjermanisë, Francës, Italisë dhe BE-së, ku Republika e Kosovës theksoi qëndrimet e saj si dhe gatishmërinë për nënshkrim dhe zbatim të plotë të marrëveshjeve”, thuhet në komunikatën për media.

Tutje bëhet e ditur se “draft-propozimi për zbatim të nenit 7 ndërlidhur me nenin 10 nuk ishte pjesë e diskutimeve, por u ritheksua qëndrimi i Kryeministrit Kurti të paraqitur me 26 tetor para liderëve, që nënkupton se ecja tutje duhet bërë në pajtim me parimin se vetëm nënshkrimi nënkupton pranim dhe zbatim të marrëveshjeve”.

“Në diskutimin mbi planin e sekuencimit të zbatimit u paraqitën komentet tona që insistojnë në zbatim të plotë të Marrëveshjes Bazike. U trajtuan dhe marrëveshjet të cilat kanë hasur në pengesa e moszbatueshmëri në proces nga pala serbe, siç janë ajo e energjisë dhe çështja e personave të zhdukur me dhunë. Kosova u pajtua me draftin e dokumentit për termat e referencës për zbatimin e Deklaratës mbi Personat e Pagjetur, pas pranimit nga ana e BE-së të komentit tonë”.

Qeveria e Kosovës tha se vijon të mbetet e përkushtuar dhe palë konstruktive në proces, e angazhuar maksimalisht për normalizim të plotë të marrëdhënieve me Serbinë dhe për njohje reciproke. /Telegrafi/