Biden: Shpresoj se armëpushimi do të arrihet deri në Ramazan në Gaza

Joe Biden tha dje se shpreson të arrijë një marrëveshje armëpushimi midis Izraelit dhe grupit militant Hamas deri në muajin e shenjtë mysliman të Ramazanit.

I pyetur nëse ai priste një marrëveshje deri atëherë, presidenti amerikan tha se “shpresoj që po. Ne jemi ende duke punuar shumë për të”.

“Ne nuk e kemi arritur ende këtë”, tha ai para gazetarëve ndërsa u largua nga Shtëpia e Bardhë, raporton bbc.

Deklarata e 81-vjeçarit vjen mes bisedimeve të tensionuara për armëpushim ndërsa presioni rritet mbi të për të ndihmuar në zbutjen e konfliktit.

Marrëveshja e propozuar kërkon një pauzë 40-ditore të të gjitha operacioneve ushtarake që nga fillimi i Ramazanit, si dhe një rritje të fluksit të ndihmave në Gaza, tha një burim i afërt me negociatat për agjencinë e lajmeve reuters.

Lexo po ashtu A është në horizont një marrëveshje armëpushimi në Gaza?

Raportohet se kjo do të përfshijë gjithashtu edhe një marrëveshje – lirimi i një pengu izraelit për dhjetë të burgosur palestinezë.

Muaji i shenjtë mysliman, gjatë të cilit besimtarët agjërojnë nga agimi deri në perëndim të diellit, do të fillojë më 10 ose 11 mars. Fillimi i saktë i Ramazanit përcaktohet nga shikimi i parë i gjysmëhënës, kështu që mund të ndryshojë nga vendi në vend. /Telegrafi/