Biden ende beson se mund të arrihet një marrëveshje armëpushimi për Gazën

Larg nga situata që po përshkallëzohet në Liban, po vazhdon lufta në Gaza.

Presidenti i SHBA-së, Joe Biden, ka deklaruar se arritja e një marrëveshjeje për armëpushim në enklavën e rrethuar është ende e mundur, duke thënë se “duhet të vazhdojmë të punojmë për këtë.”

Ai e bëri këtë koment ndërsa fliste me gazetarët në Delaware, shkruan skynews.

I pyetur për ndikimin e luftimeve diku tjetër në rajon, Biden gjithashtu tha se “duhet të sigurohemi që njerëzit e Izraelit verior, si dhe të Libanit jugor, të kthehen në shtëpitë e tyre dhe të kthehen të sigurt”.

Bisedimet për armëpushim kanë vazhduar në sfondin e konfliktit që nga prishja e marrëveshjes së fundit për armëpushim që zgjati një javë në fund të vitit të kaluar, me disa propozime të paraqitura dhe të hedhura poshtë për arsye të ndryshme.

Hamas ka këmbëngulur se nuk do të pranojë asnjë marrëveshje që nuk përfshin tërheqjen e plotë të forcave izraelite, ndërsa Izraeli ka deklaruar se nuk do të nënshkruajë një armëpushim deri sa të çmontohet kapaciteti ushtarak i Hamasit.

Ndryshe, që nga 7 tetori i vitit të kaluar janë vrarë mbi 40 mijë palestinezë dhe 1200 izraelitë në luftën Izrael-Hamas. /Telegrafi/