Hamza viziton Hidrocentralin e Orqushës: Projektet e energjisë së ripërtërishme, prioritet i qeverisjes sonë

Kandidati për kryeministër nga Partia Demokratike e Kosovës (PDK), Bedri Hamza, ka vizituar sot Hidrocentralin e Orqushës në Dragash, ku ka theksuar rëndësinë e investimeve strategjike në sektorin e energjisë dhe ujit.

“Energjinë pozitive që po e marrim anekënd vendit do ta përdorim për t’i sjellë energji krejt Kosovës, pasi ta nisim punën si qeveri e re për një Kosovë më të mirë,” deklaroi Hamza.

Gjatë vizitës, ai pa nga afër procesin e prodhimit të energjisë nga ky hidrocentral, duke theksuar se projektet e energjisë së ripërtërishme janë prioriteti kryesor i programit të tij qeverisës.

“Premtimi im është i qartë: do ta fillojmë ndërtimin e liqeneve të reja akumuluese dhe do ta përshpejtojmë ndërtimin e centraleve të reja prodhuese, sidomos nga energjia e ripërtërishme. Brenda mandatit tim katërvjeçar do të kemi 1000 megavatë të rinj, që ta nxjerrim Kosovën një herë e përgjithmonë nga terri,” tha Hamza.

Ai gjithashtu premtoi ndërtimin e dy ujëmbledhësve të rinj për të garantuar furnizimin e qëndrueshëm me ujë për vendbanimet në Kosovë.

Ky angazhim, sipas Hamzës, është pjesë e një plani të gjerë për të rritur pavarësinë energjetike dhe për të përmirësuar jetesën e qytetarëve në të gjitha komunat e Kosovës.