Bashkëshorti i kancelares Angela Merkel ka një mesazh për gjermanët: Ata që nuk po vaksinohen, nuk po e përcjellin shkencën

Joachim Sauer, bashkëshorti i kancelares gjermane Angela Merkel, i dha fund sot heshtjes duke “kritikuar” gjermanët që janë skeptikë të vaksinohen kundër coronavirusit.

“Është befasuese që një e treta e popullatës nuk po ndjekin të arriturat shkencore. Ndoshta kjo nga gjumi i thellë në të cilin kanë rënë dhe skepticizmit”, ka thënë hulumtuesi i fizikës kuantike gjatë një interviste dhënë për të përditshmen italiane La Republica, transmeton Telegrafi.

Sipas tij, pjesën tjetër e përbëjnë personat që e shohin këtë si reaksion ideologjik duke e cilësuar si diktaturë vaksinimin. Sauer shtoi se në këtë grup ka profile të ndryshme, nga akademikë, mjekë e deri te shkencëtarët.

Ndërkaq i pyetur për “refuzimin e të arriturave dhe gjetjeve shkencore”, Sauer vlerësoi se “një qëndrim i tillë sigurisht se gjithmonë ka ekzistuar tek disa persona, por kurrë nuk ka qenë aq i theksuar sikurse tani”.

“Jemi dëshmitarë të suksesit të madh të shkencës”, tha fizikani i cili zakonisht shmang deklaratat dhe qëndrimet publike.

Sipas tij, askush nuk do të guxonte të vente bast se do të prodhohej vaksina kundër COVID-19, në një kohë kaq të shkurtër. Sauer tha se shkenca është shumë e rëndësishme dhe do të ishte mirë që të rinjtë t’i përkushtohen më shumë.

Kujtojmë që në Gjermani përqindja e të vaksinuarve është nën 70 për qind, që është më pak krahasuar me vendet e tjera anëtare të BE-së, siç është Franca ku përqindja e të vaksinuar është 75 për qind. /Telegrafi/