Basha takon Kurtin, flasin për krijimin e mundësive për të rinjtë, që të mos ikin nga Kosova e Shqipëria  

Kryetari i Partisë Demokratike të Shqipërisë, Lulzim Basha ka takuar sot gjatë vizitës së tij në Kosovë edhe kryetarin e Lëvizjes Vetëvendosje, Albin Kurti me të cilin biseduan për zhvillimet ekonomike, politike e rajonale.

Basha njoftoi përmes një postimi në Facebook se biseda me Kurtin ishte kryesisht për situatën ekonomike dhe shëndetësore të shkaktuara nga pandemia, si dhe siç tha ai rëndësinë e hapave që duhet të merren për të krijuar mundësi që të rinjtë të punojnë  e jetojnë në Kosovë e Shqipëri.

“Gjatë qëndrimit në Kosovë, ndava disa orë të këndshme me Kryetarin e VV Albin Kurti, ku diskutuam për të gjitha zhvillimet e rëndësishme ekonomike, politike dhe rajonale. U ndalëm gjerësisht në bisedën tonë tek situata ekonomike dhe shëndetësore të shkaktuar nga pandemia e COVID-19. Është shumë e rëndësishme që të koordinojmë përpjekjet dhe të ndërmarrim nisma të përbashkëta, për sa i përket përballjes në aspektin shëndetësor të COVID-19, por edhe për situatën ekonomike, e cila ka sjellë probleme të shumta. Me fokus të veçantë nënvizuam rëndësinë e hapave që duhen ndërmarrë për të ndalur largimin e dhimbshëm të të rinjve, e për t’u krijuar atyre mundësi të punojnë dhe jetojnë në Shqipëri e Kosovë”, shkruan Basha.

Basha theksoi se gjatë këtij takimi kanë ndarë të njëjtin mendim me Kurtin, se dy vendet duhet të intensifikojnë bashkëpunimin.

“Ndamë të njëjtin mendim, se nevojitet një intensifikim i bashkëpunimit mes dy vendeve, projekte dhe nisma konkrete, dhe jo ide që mbeten në letër. E sigurova zotin Kurti, se unë dhe Partia Demokratike e Shqipërisë, sot në opozitë dhe nesër në drejtim të vendit, do të jemi në krah të Kosovës, dhe maksimalisht të angazhuar për t’i ofruar çdo ndihmë, dhe për të marrë çdo vendim në mbështetje të saj. Theksova rëndësinë e dialogut mes Kosovës dhe Serbisë, domosdoshmërinë e moscënimit të integritetit territorial të Republikës së Kosovës dhe arritjen e një marrëveshjeje që do të çojë në njohjen respektive, mes Republikës së Kosovës dhe asaj të Serbisë”, shkruan Basha. /Telegrafi/