Baily: “Jugohromi” çështje e ndërlikuar të zgjidhet me konsultimin e qytetarëve

Ka përfunduar afati i paraparaë për fillimin e vendosjes së filtrave nga ana e “Jugokrom”, por edhe pse drejtuesit e fabrikës kanë thanë se do ti fillojnë punimet deri më 25 qershor, sot nuk kishte asnjë lëvizje në këtë drejtim, transmeton Telegrafi Maqedoni.

Ministri i mjedisit jetësor dhe planifikimit hapësinor, Bashkim Ameti, nuk ka dashur të komentojë zvarritjen e punimeve për vendosjen e filtrave. Ai përkujtoi vetëm se kombinati metalurgjik ka afat deri më 31 tetor për të përmbushur këtë obligim.

“Në mua mos llogarisni avokat të “Jugokrom”, por jam përfaqësues i qeverisë dhe përfaqësues i popullit. Gjithsesi, ne jemi të interesuar, e kam thënë edhe më herët, qëndrimi ynë është publik, se jemi për “Jugokrom” dhe gjithsecilin që duhet të vendos filtra dhe të plotësohen standardet për të vazhduar me punë. Ju e dini se ka një vendim aktual deri më 31 tetor, por nëse janë vendosur apo jo dhe çka punohet për momentin do drejtoheni në “Jugokrom”,- ka deklaruar, Ameti.

Ambasadori amerikan, Jess Baily, kërkoi që në zgjidhjen e këtij problemi të përfshihen edhe qytetarët.

“Kjo është mënyra më e mirë se si duhet ta zgjidhni këtë problem, pra me angazhimin e qytetarëve dhe të qeverisë. Është çështje e ndërlikuar, që ka të bëjë me punëtorët, me shëndetin e njerëzve, por gjithsesi duhet të ndërmerren veprime”,- ka thënë, Baily.

Afati përfundimtar për vendosjen e filtrave është 31 tetori, por që ai të përmbushet punimet duhej të kishin filluar deri tani./Telegrafi