“Autostrada Biennale” prezanton kuratoret e edicionit të tretë

Bienalja Ndërkombëtare e Artit Bashkëkohor, “Autostrada Biennale”, njofton se Ovul O. Durmusoglu dhe Joanna Warsza do të jenë bashkëkuratore të edicionit të tretë që do të mbahet në korrik-shtator 2021.

Bienali më 2021 do të trajtojë mënyrat se si pandemia ka ndikuar në mendimet për qytetet tona, për hapësirat përreth, asaj që mund t’i rikthehemi, çfarë mund të lëmë pas dhe sa është i nevojshëm arti në kohë pasigurie.

“Autostrada Biennale” nisi në Prizren në vitin 2014 (edicioni i parë më 2017), nga nevoja për më shumë shkëmbim kulturor në rajon, si dhe për hapje ndaj botës.

“Sot është koha për të imagjinuar një tjetër të nesërme: si të ndërtojmë ura arti përtej ekraneve dhe kubeve të bardha në publik; si të vazhdojmë të jemi kureshtar; si të gëzohemi dhe si të bashkëndjejmë; si të jemi të afërt me artin dhe artistët; si të praktikojmë qasjen translokale; si t’a përqafojmë shqetësimin për të ardhmen e paparashikueshme dhe të ëndërrojmë përtej saj?” thonë kuratoret. “’Autostrada Biennale’ do t’u përgjigjet rrethanave dhe peizazhit politik, do të dërgojë sinjale tymi nga këtu-atje, do të prodhoj kënaqësi të përbashkët përmes mësimit dhe veprimit asimetrik. Jemi më shumë se të ngazëllyera për të ndërmarrë këtë udhëtim, duke filluar nga Prizreni – një nga qytetet më multietnike dhe multikulturore të Evropës”.

Ovul O. Durmusoglu është kuratore e pavarur, shkrimtare dhe pedagoge. Joanna Warsza është drejtoreshë e programit CuratorLab në Universitetin e Arteve Konstfack në Stokholm, si dhe kuratore e pavarur.