Associated Press: Milan Radoiçiq është urdhëruar të raportojë rregullisht në policinë serbe, por akuzë s’ka

Milan Radoiçiq, udhëheqës i grupit që kreu sulmin ndaj policisë së Kosovës, është urdhëruar të raportojë rregullisht tek autoritetet serbe, ndërkohë që nuk janë ngritur akuza ndaj tij, sipas zyrtarëve serbë të martën.

Kosova akuzoi Radoiçiqin në mungesë, duke kërkuar gjithashtu ekstradimin e tij, por autoritetet serbe, pas ndalimit dhe lirimit të tij, nuk ngritën akuza.

“Radoiçiqi u mor në pyetje në Beograd më 3 tetor, kur iu konfiskua pasaporta,” konfirmoi një përfaqësues i Gjykatës së Lartë të Beogradit për The Associated Press.

Ai shtoi se Radoiçiqi është urdhëruar të raportojë pranë policisë çdo datë të parë dhe të 15-të të muajit dhe nuk lejohet të largohet nga Serbia ose të udhëtojë në Kosovë.

Nga ana e saj, Qeveria e Kosovës e akuzoi Beogradin për përpjekje për të mbrojtur Radoiçiqin nga drejtësia.

“Serbia po mbron një kriminel lufte duke refuzuar të bashkëpunojë për ndjekjen e tij penale,” deklaroi një zyrtar i lartë kosovar.

Në sulmin e datës 24 shtator 2023, pas përplasjes së armatosur me njësitë speciale të Policisë së Kosovës, ku mbetën të vrarë tre sulmues, grupi i udhëhequr nga Radoiçiq u tërhoq dhe u arratis drejt Serbisë.

Në fillim të këtij muaji, autoritetet e Kosovës paditën Radoiçiqin dhe 44 persona të tjerë për rolin e tyre në sulmin e Banjskës.

Megjithatë, sipas AFP, gjyqi i cili pritet të fillojë të mërkurën në Kosovë, do të zhvillohet vetëm me praninë e tre të akuzuarve, ndërsa pjesa tjetër, përfshirë Radoiçiqin, do të gjykohet në mungesë.

Beogradi dhe Prishtina kanë refuzuar të bashkëpunojnë në lidhje me këtë rast, duke e bërë çështjen një tjetër pikë tensioni midis dy vendeve./Telegrafi/