Arsenali ka kërkuar përfshirjen e një klauzole ambicioze në marrëveshjen për transferimin e Viktor Gyokeres, e cila thuajse e rrezikoi përfundimin e marrëveshjes, sipas raportimeve.
Të mërkurën në mëngjes, The Guardian raportoi se Arsenali dhe Sportingu kishin arritur një marrëveshje për transferimin e sulmuesit suedez Gyokeres, pas një procesi të gjatë negociatash.
Marrëveshja thuhet se ka një vlerë totale deri në 73.5 milionë euro, me sulmuesin që do të bëhet blerja e gjashtë e Arsenalit për këtë verë, pas nënshkrimeve me Martin Zubimendi, Christian Norgaard, Kepa Arrizabalaga, Noni Madueke dhe Cristhian Mosquera.
Arsenali po siguron një nga sulmuesit më të kërkuar në Evropë, pasi ish-lojtari i Brighton realizoi 54 gola në 52 ndeshje për Sportingun sezonin e kaluar.
Megjithatë, tifozët e Arsenalit mund të kishin menduar se marrëveshja ishte në rrezik javën e kaluar, pasi negociatat po zvarriteshin.
The Guardian raportoi se një nga pikat e debatit në bisedime ishte fakti që Sportingu besonte se vetëm 5 milionë euro nga 10 milionë eurot e bonuseve të propozuara nga Arsenali ishin realisht të arritshme.
Një nga klauzolat e sugjeruara, sipas raportit, ishte që Gyokeres të fitonte Topin e Artë gjatë kohës që do të ishte te Arsenali.
Saga e këtij transferimi pati disa kthesa, me Sportingun që këmbënguli për të marrë shumën e plotë të kërkuar, ndërsa lojtari refuzoi të paraqitej në stërvitjet parasezonale për të shtyrë lëvizjen drejt Londrës.
Arsenali kishte si objektiv transferimin e një sulmuesi këtë verë, pasi kaloi pjesën më të madhe të sezonit 2024/2025 pa një ‘numër 9’ të mirëfilltë, për shkak të dëmtimeve të Kai Havertz dhe Gabriel Jesus./Telegrafi/
