Arrestohet një person në Gjilan, dyshohet se ishte përfshirë në disa raste të vjedhjeve

Një person me inicialet D.M është arrestuar pasi dyshohet se është përfshirë në të paktën dy raste të vjedhjeve të rënda.

Sipas njoftimit të Policisë bëhet e ditur se rastet kanë ndodhur gjatë muajit shkurt të këtij viti.

“Njësiti i Hetimeve të Stacionit Policor në Gjilan me datën 11.02.2025 si rezultat i ndërmarrjes së veprimeve të shpejta dhe efikase operative e hetimore ka arritur që të identifikoj, lokalizoj dhe arrestoj të dyshuarin D.M. (viti i lindjes 1992, mashkull kosovar).

Arrestimi i tij është bërë me dyshimin e përfshirjes së tij në të paktën dy raste të vjedhjeve të rënda, raste të ndodhura gjatë muajit shkurt të vitit 2025”, thuhet në njoftim.

Tutje bëhet e ditur se pas arrestimit nga të dyshuarit janë sekuestruar dëshmi të cilat do të përdorën në Gjykatë.

“I dyshuari është intervistuar në prezencën e avokatëve mbrojtës dhe me vendim të Prokurorit të Shtetit është ndaluar në qendrën e mbajtjes për 48 orë. Rasti me kallëzim penal procedohet në Prokurorinë Themelore”, thuhet ndër të tjera në njoftim. /Telegrafi/