Arrestimi i Mulakut, deputeti Avdyli: Hap drejt kalimit nga mjekësia mesjetare në mjekësi moderne

Gjatë ditës Policia e ka arrestuar Nazmi Mulakun nga Vushtrria, i cili në rrjetet e tij sociale pretendonte se është një mjek popullor dhe se shëron disa sëmundje.

Për këtë ka reaguar deputeti i Listës GUXO, Haxhi Avdyli, përmes një postimi në Facebook, duke e quajtur matrapaz dhe mashtrues të arrestuarin.

“Falënderoj organet e rendit dhe drejtësisë për përgjigjen e shpejtë ndaj thirrjes sonë publike për vendosjen e shtetit ligjor në sferën e shëndetit publik. Arrestimi i sotshëm i matrapazit apo të vetëquajturit ‘mjek’ popullor është vetëm veprimi i parë që duhet vazhduar edhe me tutje gjithandej Kosovës”, ka shkruar Avdyli, transmeton Telegrafi.

Lexo po ashtu Arrestohet Nazmi Mulaku nga Vushtrria, në videot e tij në "TikTok" pretendonte se është mjek popullor

Sipas tij, me këto arrestime po bëhen hapa drejt kalimit nga mjekësia mashtruese mesjetare te mjekësia moderne.

“Me këto arrestime e ndalesa ne po bëjmë hapin e madh të kalimit nga mjekësia mashtruese e mesjetës, në mjekësi moderne të shekullit 21. Shëndetësia publike është çështje shumë serioze për ta lënë në duar të mashtruesve injorantë që jo vetëm që po dëmtojnë xhepin, por edhe shëndetin e qytetarëve tanë”, ka shtuar Avdyli. /Telegrafi/