Apple prezanton zyrtarisht MacBook Air-in e ri me tre përmirësime: procesor më të fuqishëm, ngjyrë të re dhe kamerë të avancuar

Apple ka prezantuar zyrtarisht MacBook Air-in e ri, i cili sjell tre ndryshime kryesore: një procesor më të fuqishëm, një ngjyrë të re dhe një kamerë të përmirësuar në pjesën e përparme.

M4 – Procesori më i fundit nga Apple

Modelet e reja të MacBook Air-it tani vijnë me procesorin e fundit Apple M4, i cili u prezantua vitin e kaluar në iMac dhe Mac mini. Ky procesor ka 10 bërthama CPU dhe 8 ose 10 bërthama GPU, në varësi të konfigurimit. Sipas Applet, procesori M4 ofron 1.6 herë performancë më të shpejtë në Excel, 2 herë më të shpejtë në iMovie dhe 2 herë më të shpejtë në Adobe Photoshop, krahasuar me modelet që përdorin procesorin M1.

Gjithashtu, procesori M4 sjell përmirësime në mbështetjen për ekranet e jashtme. Ndryshe nga modeli i mëparshëm, i cili mbështeste vetëm një ekran të jashtëm, MacBook Air me M4 mund të lidhet me dy ekrane 6K me frekuencë rifreskimi 60 Hz.

Ngjyra e re: Sky Blue

MacBook Air tani vjen edhe në një ngjyrë të re të quajtur “Sky Blue”, një nuancë metalike e kaltër e lehtë. Kjo ngjyrë i bashkohet paletës ekzistuese të opsioneve Midnight, Starlight dhe Silver.

Kamera e përmirësuar dhe funksionalitete të reja

Të gjithë modelet e reja të MacBook Air tani përfshijnë një kamerë Center Stage 12 MP, e njëjta që gjendet edhe te MacBook Pro. Edhe pse rezolucioni i videos mbetet 1080p, sensori i përmirësuar lejon kapjen e imazheve me rezolucion më të lartë.

Kamera ultra e gjerë mbështet funksionin Center Stage, duke mundësuar lëvizjen e lirë të përdoruesit në një dhomë, ndërkohë që kamera e mban subjektin në qendër të kornizës. Një tjetër funksion interesant është Desk View, i cili kap imazhin e përdoruesit dhe një pamje të përshtatur të tryezës së punës.

Dizajn dhe bateri me kapacitet pak më të lartë

Përveç këtyre ndryshimeve, MacBook Air mbetet identik me modelin e mëparshëm në aspektin e dizajnit, dimensioneve, ekranit, tastierës, trackpad-it, konfigurimeve të memories, altoparlantëve dhe mikrofonit.

Një ndryshim i vogël vjen në kapacitetin e baterisë, e cila tani është 53.8 Wh, krahasuar me 52.6 Wh të modelit të mëparshëm. Megjithatë, jeta e baterisë mbetet e njëjtë.

Çmimi dhe disponueshmëria
MacBook Air me M4 vjen në dy madhësi:

13 inç me çmim 999 dollarë
15 inç me çmim 1,199 dollarë

Modelet e reja tashmë janë të disponueshme për porosi dhe do të fillojnë dërgesat në javët e ardhshme. /Telegrafi/