Andonov: Gjendja me sistemin elektro-energjetik në RMV është stabile

Bashkëpunëtori për Energjetikë në Qeverinë e Republikës së Maqedonisë së Veriut, Viktor Andonov, në konferencën e sotme për shtyp i dha informacionet më të fundit lidhur me gjendjen energjetike në vend.

Siç informoi bashkëpunëtori për Energjetikë, rekomandimet për kursim të energjisë elektrike tashmë janë zbatuar nga institucionet, gjë që dëshmojnë edhe shifrat e muajit tetor, të cilat tregojnë se institucionet shtetërore kanë arritur të kursejnë 24 % të energjisë elektrike. Qeveria e Republikës së Maqedonisë së Veriut, me qasjen e përkushtuar dhe të përgjegjshme të të gjithë punonjësve të saj, ka kursyer gjithsej 32 % të energjisë elektrike.

Andonov konfirmoi se trendi i kursimit të energjisë elektrike është në trend të rritjes dhe se në shtator në krahasim me të njëjtin muaj të vitit të kaluar kemi pasur 20 % kursime në energji elektrike, ndërsa tashmë në tetor konstatojmë se kemi rritje dhe është 24 % krahasuar me muajin tetor të vitit 2021.

Bashkëpunëtori për energjetikë Andonov apeloi që në periudhën e ardhshme të gjithë të jenë maksimalisht të përgjegjshëm.

“Për shkak të uljes së temperaturave, le të jemi edhe më të kujdesshëm në përdorimin e energjisë elektrike për të vazhduar këtë trend të uljes së konsumit, pra për të vazhduar rritjen e kursimeve. Si një Qeveri e përgjegjshme, ne menaxhojmë resurset me përgjegjësi. Dua të falënderoj të gjithë bashkëpunëtorët e mi në Qeveri dhe të gjithë punonjësit në institucionet shtetërore që treguan një ndërgjegjësim të lartë për situatën në të cilën ndodhemi dhe me sa duket, shifrat tregojnë një rezultat me kursime që janë shënuar për muajin e dytë rresht”, theksoi Andonov.

Ai tha se çdo ndryshim i vogël në shprehitë mund të çojë në kursime të mëdha në energji elektrike dhe burime dhe se kursimet janë shumë të rëndësishme për të pasur një sistem të qëndrueshëm energjetik dhe për të ulur ngarkesën.

Në konferencë për shtyp, bashkëpunëtori për Energjetikë prezantoi bilancin ditor energjetik për prodhimin e energjisë elektrike nga dita e djeshme, 22 nëntor.