Pas dorëheqjes së Memli Krasniqit nga pozita e kryetarit të Partisë Demokratike të Kosovës (PDK), Telegrafi ka realizuar një sondazh online për të matur opinionin e lexuesve rreth pasardhësit të tij të mundshëm.
Në sondazh, ku kanë marrë pjesë 2,309 votues, shumica prej tyre, 39%, kanë vlerësuar se Bedri Hamza duhet të jetë kryetari i ardhshëm i PDK-së.
Pas tij renditet Sami Lushtaku me 13%, ndërsa Agim Aliu dhe Uran Ismaili kanë marrë nga 11% secili. Vlora Çitaku ka marrë 7%, ndërsa Shaqir Totaj vetëm 3% të votave. Ndërkohë, 15% e pjesëmarrësve kanë zgjedhur opsionin “Tjetër”.
Dorëheqja e Krasniqit erdhi pas mbledhjes së Kryesisë së partisë, ku ai deklaroi se ka qenë “nder të udhëheqë PDK-në” dhe se partia ka kaluar shumë sfida gjatë kohës së udhëheqjes së tij.
Ai dha dorëheqje pesë muaj pas rizgjedhjes në krye të partisë për një mandat të dytë në qershor të këtij viti.
Në fjalën e tij, ai bëri të ditur se Konventa e PDK-së do të mbahet më 17 nëntor, ku do të zgjidhet kryetari i ri.
“Ky vendim nuk është as i momentit dhe nuk lidhet vetëm me zhvillimet e fundit. Është reflektim i gjatë i imi mbi atë se çfarë i duhet më shumë partisë në fazën e ardhshme”, deklaroi ai.
Sipas Krasniqit, PDK-ja ka nevojë për “një momentum dhe një mundësi të re për familjen demokratike”.
Ai shtoi se në zgjedhjet e ardhshme, kandidati i PDK-së për kryeministër duhet të jetë njëkohësisht edhe kryetari i partisë.
Gjatë drejtimit të tij, PDK-ja doli e dyta në zgjedhjet parlamentare të 9 shkurtit, duke siguruar 24 ulëse në Kuvend me Bedri Hamzën si kandidat për kryeministër, ndërsa në zgjedhjet lokale të këtij viti partia fitoi gjashtë komuna, duke pësuar një rënie të lehtë krahasuar me zgjedhjet paraprake.
Krasniqi e kishte marrë drejtimin e PDK-së në vitin 2021./Telegrafi/