Rrjet i dobët? Kjo pajisje në kuzhinë po ua ngadalëson internetin, pa dijeninë tuaj

Në ditët e sotme, është shumë e zakonshme të kryejmë disa aktivitete online njëkohësisht – si shembull, duke shikuar Netflix ndërkohë që porositim ushqime, ose duke transmetuar, kërkuar dhe shkarkuar informacione në të njëjtën kohë. Kjo mund të bëjë që një ndërprerje të Wi-Fi të jetë një shqetësim i vërtetë. Por, ka një arsye të papritur për këtë që ndodhet shpesh në kuzhinën tuaj dhe mund të ngadalësojë lidhjen e internetit.

Ekspertët e teknologjisë thonë se është mjaft e zakonshme që lidhja Wi-Fi të ngadalësohet kur përdorni mikrovalën, por fatmirësisht ka disa mënyra për të parandaluar këtë problem. Mikrovalët dhe rrjetet Wi-Fi përdorin frekuenca të ngjashme, dhe kjo mund të shkaktojë interferenca që ndikojnë në ruterin tuaj, shkruan Express.co.uk.

Mikrovalët punojnë në frekuencën 2.45 GHz, ndërsa shumica e router-ave Wi-Fi përdorin frekuencën 2.4 GHz. Kjo do të thotë se, nëse ka rrjedhje rrezatimi nga mikrovalët, kjo mund të interferojë me sinjalet e Wi-Fi.

Edhe pse mikrovalët janë të dizajnuar për të parandaluar rrjedhjet, standardet ndërkombëtare lejojnë një sasi të vogël rrezatimi, që është e sigurt për ekspozimin e njeriut. Megjithatë, nëse ky rrezatim është afër kufirit të lejuar, mund të krijojë "zhurmë" në frekuencën e Wi-Fi-së, duke bërë më të vështirë dhe më të ngadaltë për pajisjet që marrin sinjalet për t'i dekoduar ato, sipas ekspertëve të kompanisë të pajisjeve Whybuy.

Një përdorues në një forum të Reddit, që është fokusuar në këtë çështje, tha: "Kur punoja në mbështetje teknike të internetit, shpesh merrja thirrje për këtë problem. Siç është thënë nga të tjerët, mikrovalët interferojnë shumë me ruterin e Wi-Fi-s".

Një tjetër përdorues shtoi: "Ndërroni vendin e mikrovalës. Nuk e kuptoj pse njerëzit e pranojnë këtë si diçka normale”.

Nëse keni vënë re që Wi-Fi-ja ngadalësohet ose ndalon kur përdorni mikrovalën, mund të provoni disa opsione.

Së pari, mund të zhvendosni ruterin më larg nga mikrovala për të ulur mundësinë e interferencave. Nëse kjo nuk ndihmon, mund të kaloni në një rrjet Wi-Fi që përdor opsionin 5 GHz, e cila është më pak e prirur të interferojë.

Nëse mikrovala e juaj është mjaft e vjetër, pjesët si dyert dhe shufrat mund të shkaktojnë më shumë rrjedhje, kështu që mund të jetë e nevojshme ta zëvendësoni me një model më të ri.