Kupa e Botës në SHBA, Kanada dhe Meksikë ka përfunduar, por emocionet dhe historitë e saj do të mbeten gjatë në kujtesën e tifozëve të futbollit. Edicioni më i madh i këtij turneu solli jo vetëm më shumë ekipe dhe ndeshje, por edhe një numër të madh rekordesh të reja.
Më poshtë janë disa prej arritjeve më të spikatura të këtij Botërori:
Dick Advocaat, trajneri më i vjetër në historinë e Botërorit
Trajneri i Curaçaos, Dick Advocaat, është bërë strategu më i vjetër që ka drejtuar një ndeshje në Kupën e Botës. Ai ishte 78 vjeç e 271 ditë në sfidën e fundit të ekipit të tij ndaj Bregut të Fildishtë.
Bellingham, Kane, Mbappe dhe Dembele shkruajnë historinë
Jude Bellingham dhe Harry Kane, si dhe dyshja franceze Ousmane Dembele dhe Kylian Mbappe, janë bërë bashkëlojtarët e parë që kanë shënuar nga gjashtë ose më shumë gola në një edicion të vetëm të Kupës së Botës.
Deschamps thyen rekordin për paraqitje si trajner
Didier Deschamps është bërë trajneri me më së shumti ndeshje të drejtuara në historinë e Kampionateve Botërore. Francezi ka arritur kuotën e 26 paraqitjeve, duke kaluar rekordin e mëparshëm të Helmut Schönit të Gjermanisë Perëndimore, i cili kishte 25 ndeshje.
Manzambi, zëvendësuesi më i ri me dy gola në një ndeshje
Johan Manzambi i Zvicrës ka hyrë në histori si zëvendësuesi më i ri që ka shënuar dy gola në një ndeshje të Kupës së Botës. Ai e arriti këtë sukses në moshën 20 vjeç e 247 ditë.
Mbappe bëhet golashënuesi më i mirë i të gjitha kohërave në Botëror
Kylian Mbappe ka vendosur një nga rekordet më të rëndësishme të turneut. Sulmuesi francez është tashmë golashënuesi më i mirë në historinë e Kupës së Botës me 22 gola.
Para këtij Botërori, rekordi mbahej nga gjermani Miroslav Klose me 16 gola. Mbappe kryeson listën me 22 gola në 22 ndeshje, i ndjekur nga Lionel Messi me 21 gola në 34 paraqitje dhe Klose me 16 gola në 24 ndeshje.
Rekorde të reja edhe për Lionel Messin
Lionel Messi vazhdon të jetë pjesë e historisë së Kupës së Botës. Argjentinasi është lojtari me më së shumti fitore në këtë kompeticion, me 23 triumfe.
Ai mban gjithashtu rekordin për më shumë ndeshje radhazi me gol të shënuar – nëntë, si dhe për më shumë gola të realizuar nga jashtë zonës së rreptësisë – shtatë.
Olise vendos standard të ri për asistime
Michael Olise i Francës ka vendosur rekordin për më së shumti asistime në një edicion të Kupës së Botës. Ai ka regjistruar shtatë asistime, duke kaluar rekordin e legjendës braziliane Pele, i cili kishte gjashtë në Botërorin e vitit 1970.
Pesë prej asistimeve të Olises ishin për Kylian Mbappen, një rekord i ri për kombinimin mes dy lojtarëve në një edicion të Botërorit.
Rodri dominon me pasime të sakta
Mesfushori i Spanjës, Rodri, mban rekordin për më së shumti pasime të kompletuara në një edicion të Kupës së Botës. Ai ka realizuar 790 pasime të sakta.
Rekordi i mëparshëm ishte po i tij, me 638 pasime të suksesshme në Botërorin e Katarit. Ndërsa Xavi kishte regjistruar 599 pasime të sakta në Botërorin e vitit 2010.
Cristiano Ronaldo, i vetmi me gola në gjashtë Botërorë
Cristiano Ronaldo vazhdon të mbajë një rekord unik. Kapiteni i Portugalisë është lojtari i vetëm në histori që ka shënuar gola në gjashtë edicione të ndryshme të Kupës së Botës.
Eloy Room dhe rekordi i pritjeve
Portieri i Curaçaos, Eloy Room, ka vendosur rekordin për më së shumti pritje në një ndeshje të Kupës së Botës. Ai realizoi 16 pritje ndaj Ekuadorit.
I njëjti numër pritjesh ishte arritur edhe nga Tim Howard i SHBA-së në vitin 2014, por amerikani e kishte bërë këtë pas dy vazhdimeve prej nga 15 minuta.
Unai Simon, portieri me më shumë ndeshje pa pësuar gol
Portieri i Spanjës, Unai Simon, mban rekordin për më së shumti ndeshje në Kupën e Botës pa pranuar gol. Ai ka përfunduar shtatë ndeshje pa u mposhtur.
Kupa e Botës në Amerikën e Veriut jo vetëm solli një spektakël të madh futbolli, por edhe një kapitull të ri në librin e rekordeve të këtij kompeticioni. /Telegrafi/