Refuzoi ta bënte testin e alkoolit, sulmoi policinë - arrestohet i dyshuari në Mitrovicën e Veriut

Një person është arrestuar në Mitrovicën e Veriut, pasi dyshohet se ka refuzuar të identifikohej nga zyrtarët policorë dhe t’i nënshtrohej alkool-testit, ndërsa më pas ka sulmuar fizikisht një polic.

Sipas raportit 24-orësh të Policisë së Kosovës, rasti ka ndodhur më 2 gusht, rreth orës 23:10.

I dyshuari, fillimisht, nuk ka pranuar të legjitimohej nga zyrtarët policorë dhe ka refuzuar t’i nënshtrohej testit për alkool.

“Është arrestuar i dyshuari kosovar për shkak se i njëjti fillimisht nuk ka pranuar të legjitimohet nga zyrtarët policorë dhe ka refuzuar të bëjë alkool-testin”, thuhet në raport.

Sipas Policisë, pasi është shoqëruar në stacion policor, i dyshuari dyshohet se ka sulmuar fizikisht dhe ka ofenduar një zyrtar policor.

Si pasojë e sulmit, zyrtari policor ka pranuar tretman mjekësor.

Pas inicimit të rastit dhe konsultimit me prokurorin, i dyshuari është dërguar në mbajtje. /Telegrafi/