Qytetarët e Drenasit ftohen për matje falas të nivelit të sheqerit në gjak dhe këshillime shëndetësore

Drejtoria për Shëndetësi dhe Mirëqenie Sociale e Komunës së Drenasit, në bashkëpunim me Institutin Kombëtar të Shëndetësisë Publike të Kosovës (IKSHPK), do të organizojë aktivitete sensibilizuese dhe edukative me rastin e Ditës Ndërkombëtare të Diabetit.

Më 13 dhe 14 nëntor 2025, në sallën e QKMF-së në Drenas, do të mbahen ligjërata profesionale për infermierët, me qëllim të përmirësimit të njohurive mbi parandalimin dhe menaxhimin e diabetit, përcjell Telegrafi.

Ndërsa, më 14 nëntor 2025, në sheshin “Xhevë dhe Fehmi Lladrovci”, nga ora 12:00 deri në 13:30, do të zhvillohet një aktivitet publik sensibilizues për qytetarët, ku do të ketë: Matje falas të sheqerit në gjak, Këshillime mbi parandalimin dhe kujdesin ndaj diabetit, Shpërndarje të materialeve informuese

Autoritetet komunale ftojnë të gjithë qytetarët dhe profesionistët shëndetësorë të marrin pjesë në këto aktivitete, me qëllim të ngritjes së vetëdijes për rëndësinë e kontrollit dhe trajtimit të diabetit. /Telegrafi/