Finalja e madhe e Kupës së Kosovës për edicionin 2024/25 do të zhvillohet të enjten, më 22 maj, dhe do të sjellë një përballje të zjarrtë mes dy skuadrave më të suksesshme të viteve të fundit në këtë garë – Prishtina dhe Llapi.
Prishtina, klubi më i trofeshëm ka plot 8 trofe të fituar (1994, 2006, 2013, 2016, 2018, 2020, 2023), do të synojë ta shtojë edhe një tjetër titull në arkivën e saj pas humbjes dramatike në finalen e vitit të kaluar ndaj Ballkanit pas penalltive.
Në rrugëtimin drejt finales, Prishtina ka eliminuar me sukses katër kundërshtarë: TOP Futbollin, Suharekën, Vëllaznimin dhe në gjysmëfinale Dritën – duke treguar formë dhe konsistencë.
Në anën tjetër, Llapi, që ka fituar Kupën e Kosovës dy herë radhazi në vitet 2021 dhe 2022, rikthehet në finale me ambicie të qarta për trofeun e tretë në histori.
Llapi ka kaluar pengesa të vështira duke eliminuar Flamurtarin, Vushtrrinë, Malishevën dhe më pas Drenicën në gjysmëfinale.
Kjo përballje pritet të jetë një spektakël i vërtetë futbolli mes dy skuadrave që jo vetëm kanë histori të pasur në këtë garë, por edhe tifozeri të zjarrtë dhe lojtarë cilësorë që kanë dëshmuar veten gjatë sezonit.