Pacolli: Mirënjohës sekretarit amerikan për pozicionin parimor në mbështetje të Kosovës

Ministri i Jashtëm në detyrë i Kosovës, Behgjet Pacolli, ka shprehur mirënjohjen e tij ndaj sekretarit amerikan të Shtetit, Mike Pompeo për qëndrimin e tij karshi Kosovës.

Pacolli, përmes një postimi në Facebook, ka thënë se “Sekretari Amerikan i Shtetit Mike Pompeo inkurajoi Serbinë që të përqendrohet në rifillimin e negociatave me Kosovën për një marrëveshje gjithëpërfshirëse për normalizim e përqendruar në njohjen e ndërsjellë”.

Postimi i plotë i Pacollit:“Dje Sekretari Amerikan i Shtetit Mike Pompeo inkurajoi Serbinë që të përqëndrohet në rifillimin e negociatave me Kosovën për një marrëveshje gjithëpërfshirëse për normalizim e përqendruar në njohjen e ndërsjellë.Sekretari Pompeo potencoj se ata duhet të shmangin provokimet që pengojnë procesin e normalizimit, dhe të angazhohen me frymën e kompromisit dhe fleksibilitetit të nevojshëm për të siguruar një marrëveshje dhe për të zhbllokuar potencialin e të dy vendeve.Unë jam mirënjohës ndaj Sekretarit Pompeo i cili gjithmonë ka një pozicion parimor në mbështetje të Kosovës dhe në takimet e mia me të gjatë muajve të fundit ai ka shprehur mbështetjen e fortë për njohjen e Kosovës”, ka shkruar Pacolli. /Telegrafi/