Leximi nis nga afër - Dukagjini Publishing House fillon prezantimin e lektyrave shkollore

Dukagjini Publishing House ka filluar një seri prezantimesh të veçanta të lektyrave shkollore, duke sjellë librin më afër nxënësve, mësimdhënësve dhe prindërve në Pejë, Gjakovë dhe Fushë Kosovë.

Ky aktivitet shënon fillimin e një faze të rëndësishme në promovimin e letërsisë shkollore, me fokus në tituj që prej vitesh janë pjesë thelbësore e formimit letrar të brezave të rinj.

Në qendër të këtyre prezantimeve janë vepra të njohura si “Sarajet e bardha”,” Ngjarje dhe rrëfime për Skënderbeun”, “Shigjeta e kaltër”, si dhe shumë tituj të tjerë të përzgjedhur, që përfshijnë zhanre dhe tema të ndryshme, të përshtatura për nivele të ndryshme shkollore. Librat u prezantuan në një atmosferë interaktive, ku leximi, diskutimi dhe kureshtja ishin në qendër të vëmendjes.

Përmes këtij rrugëtimi në qytete të ndryshme, Dukagjini Publishing House synon të forcojë lidhjen mes librit dhe lexuesit të ri, duke e kthyer leximin në një përvojë të gjallë dhe të afërt.

Me këto aktivitete, Dukagjini Publishing House vazhdon misionin e saj për të qenë një nga shtyllat kryesore të botimit dhe edukimit letrar, duke sjellë libra që informojnë, frymëzojnë dhe formësojnë brezat e ardhshëm.