Manchester City ka një përparësi të madhe në garën për James Trafford, falë një klauzole që i lejon klubit të barazojë çdo ofertë të pranuar nga Burnley, raporton Tyrone Marshall nga Manchester Evening News.
Sipas kësaj klauzole, nëse Newcastle United përmbush kërkesën e Burnleyt prej 40 milionë funtesh, klubi duhet të njoftojë Cityn, i cili do të ketë tre ditë kohë për të përputhur ofertën.
Trafford ka rënë dakord për kushtet personale me Manchester Cityn dhe thuhet se preferon një rikthim në Etihad, ku ishte formuar si pjesë e akademisë para se të transferohej për 19 milionë funte te Burnley në vitin 2023.
Përveç kësaj klauzole, City ka edhe një opsion riblerjeje dhe 20% të të ardhurave nga shitja e ardhshme, gjë që e forcon pozicionin e tyre në çdo negociatë për portierin.
Newcastle mbetet e interesuar për portierin dhe ka bërë një ofertë paraprake prej 27 milionë funtesh, por ajo është refuzuar nga Burnley, të cilët synojnë të përfitojnë sa më shumë nga shitja.
Trafford, 21 vjeç, konsiderohet një nga portierët më premtues anglezë, dhe një rikthim te City shihet si një hap natyral në zhvillimin e tij të mëtejshëm.
Tani mbetet të shihet nëse Newcastle do të bëjë një ofertë të përmirësuar dhe nëse City do ta aktivizojë klauzolën për ta rikthyer talentin e tyre në Etihad. /Telegrafi/