Katër “pelegrinët” serbë që u arrestuan të shtunën e javës së kaluar janë paraqitur sot në Gjykatën Themelore në Gjakovë.
Gjatë seancës, Prokuroria Themelore në Gjakovë kërkoi masën e paraburgimi ndaj tyre.
Sipas Prokurorisë së Gjakovës, ekziston dyshimi i bazuar se të njëjtit në bashkëkryerje kanë vepruar në kundërshtim me ligjin për armët, teksa gjatë kontrollit në veturën me të cilën po lëviznin u janë gjetur armë të ftohta.
Prokurorja e rastit, Venera Shala ka kërkuar paraburgimin e të akuzuarve, pasi siç tha “ka mundësi që të akuzuarit mund të arratisen, dhe kësisoj do të pamundësohej kryerja e procesit gjyqësor”.
Ajo po ashtu citoi se nuk është hera e parë që të dyshuarit kanë qenë në Kosovë.
Shala tutje tha se janë plotësuar kushtet për caktimin e masës së paraburgimit, raporton nga gjykata gazetarja e Telegrafit, Diana Mulaj.
"Lënia e tyre në liri ekziston mundësi të përsëritjes se veprës, prandaj propozimi i për masën e paraburgimit është bërë për shkaqet e lartë përmendura”, tha ajo duke i propozuar gjykatës që pas seancës dëgjimore të dyshuarve tu caktojë masën e paraburgimit prej 30 ditësh.
Ndërsa mbrojta e njërës palë tha para trupit gjykues se mjetet e gjetura kanë qenë mjete të punës, sipas asaj që deklaron i dyshuari.
“I gabuar mendimi i prokurorisë që këto mjete cilësohen si armë të ftohta”.
Avokati kërkon që prokuria me e sqaru pjesën se pse kërkon caktimin e masës së paraburgimit me arsyetimin për mundësinë e ikjes, "pasi që të dyshuarit deklarojnë që shumica e tyre jetojnë në Kosovë".
"Mbrojtja mendon që nuk ka bazë për vendimin për fillimin e procedurës penale e aq më pak për caktimin e paraburgimit, sepse këto vegla që janë gjetur, mendoj që një nga to e kam në automjet sepse po e ndërtoj shtëpinë".
Avokati kërkon refuzimin e propozimit të prokurorisë dhe lirimin e të akuzuarve.
Të arrestuarit janë: Branko Rakic me vendbanim në Mitrovicë te veriut, Nemanja Vamokiç toger i policisë me vendbanim në Novi Sad, Pavle Kragoviç, me vendbanim në Beograd, Millovan Steviq, kapiten dhe agjent i ushtrisë serbe me vendbanim në Mitrovicë të veriut.
