Nga Kosova, Gjermania, Zvicra, Austria e shumë vende të tjera të Evropës, mijëra shqiptarë morën rrugën drejt Hagës këtë të diel për të bërë zërin e tyre të dëgjohet para Gjykatës Speciale.
Me flamuj kuqezi, pankarta dhe thirrje për drejtësi, diaspora dhe qytetarë nga Kosova u bashkuan në një protestë të organizuar nga mërgata shqiptare, me mbështetjen e Organizatës së Veteranëve të Luftës së UÇK-së (OVL-UÇK).
Ekipi i Telegrafit i cili po qëndron këto ditë në Hagë, e përcolli nga afër protestën, ku u përcollen mesazhe për lirimin e ish-krerëve të UÇK-së dhe kundërshtim ndaj asaj që u quajt padrejtësi ndaj luftës së Ushtrisë Çlirimtare të Kosovës.
Mijëra qytetarëve iu adresua, ish-ambasadori holandez në Kosovë, Robert Bosch.
Bosch tha se etiketimi i UÇK-së si “organizatë kriminale” është i padrejtë dhe një ofendim edhe për NATO-n që kishte bashkëpunuar me të gjatë luftës.
Ai theksoi se UÇK-ja ishte çizmja e NATO-s.
Ndërsa Hysni Gucati, kryetar i OVL-UÇK-së, rikujtoi se lufta nuk kishte qenë për pushtet, por për liri, ndërisa kërkoi drejtësi të paanshme dhe jo të përdorur politikisht.
Nga podiumi foli edhe Fatmir Koci bashkëorganizator i protestës nga mërgata, i cili theksoi se protesta nuk ishte vetëm një shprehje pakënaqësie, por një thirrje e fortë për të rikujtuar se UÇK-ja është simbol i lirisë dhe sakrificës së popullit shqiptar.
Ai tha se akuzat e Speciales janë të njëanshme dhe se historia nuk mund të shtrembërohet përmes proceseve gjyqësore.
Protestuesit mes thirrjeve të vazhdueshme “Liri për Çlirimtarët”, "UÇK, UÇK" e cilësuan Specialen si një instrument selektiv, që po përqendrohet vetëm te ish-krerët e Ushtrisë Çlirimtare.
Ata kërkuan lirimin e tyre dhe respekt për sakrificat që sollën lirinë e Kosovës.
Pas përfundimit të fjalimeve, protestuesit u zhvendosën sërish drejt objektit të Gjykatës Speciale, por aty u përballën me një kordon të policisë holandeze dhe njësitit special, të cilët nuk lejuan që turma të qëndronte gjatë përpara ndërtesës.
Megjithatë, gjithçka përfundoi në mënyrë të qetë dhe pa incidente.
Kujtojmë se Hashim Thaçi, Kadri Veseli, Jakup Krasniqi dhe Rexhep Selimi ndodhen në paraburgim në Hagë prej nëntorit 2020, ndërsa gjykimi ndaj tyre ka nisur në prill 2023, me akuza për krime lufte dhe krime kundër njerëzimit./Telegrafi/
