Për shumicën e skuadrave në Ligën Premier, ka mbetur vetëm edhe një xhiro deri në fund të sezonit 2018/2019.
Liverpooli aktualisht është lider i ligës së Anglisë, ku ka grumbulluar 94 pikë, i ndjekur nga pas prej Manchester Cityt që ka 92 pikë, me një xhiro më pak të zhvilluar.
‘The Reds’ e mposhtën Newcastle Unitedin në udhëtim me rezultat 3-2, gjersa Jordan Henderson ka thënë se atyre u duhet një mrekulli për ta fituar titullin.
“Djemtë do ta shikojnë ndeshjen e të hënës ndaj Manchester Cityt dhe Leicester Cityt dhe ne shpresojmë në një mrekulli”, ka thënë fillimisht kapiteni i Liverpoolit.
“City është një skuadër fantastike, por edhe ne jemi ashtu. Cilado që e fiton titullin e meriton. Ne nuk mund të bëjmë më shumë. Nuk kemi për çfarë të pendohemi".
“Do të vendoset gjithçka në ndeshjen e fundit dhe në Anfield. Lutemi për një mrekulli, mund të ndodhë”, ka shtuar më tej Henderson.
Manchester City do të përballet sot (e hënë) me Leicesterin nga ora 21:00 në Etihad Stadum në kuadër të javës së 37-të në Ligën Premier. /Telegrafi/