Kompania vendore, FLORI Diamonds ia ka dhuruar Presidencës së Kosovës një borsh të kuruar me shumë kujdes, i cili është i stolisur me 109 gurë të çmueshëm në kujtim të fëmijëve të zhdukur nga lufta.
Kjo dhuratë u dorëzua nga përfaqësuesi i kompanisë, Trim Gjota, i cili gjatë javës së kaluar, për nder të 1 qershorit, Ditës së Fëmijëve, vizitoi presidenten Vjosa Osmani bashkë me një grup të baletit të fëmijëve, me performancë artistike nga koreografja Rreze Qerreti, si dhe Ilda Nuhiu e Arta Haiziri.
“Kjo ditë iu dedikua 1133 fëmijëve të pafajshëm që u vranë në mënyrën më makabre nga regjimi gjenocidal serb gjatë luftës së viteve 1998-1999, ndërkaq numri i fëmijëve të vrarë përgjatë gjithë viteve të 90-ta është edhe më i madh”, thuhet në njoftimin për media të Presidencës.
“Kujtesa për ta do të jetë e gdhendur përjetësisht në një brosh të kuruar me shumë kujdes nga FLORI Diamonds, i cili është i stolisur me 109 gurë të çmueshëm në kujtim të 109 fëmijëve ende të zhdukur”.
Osmani ka thënë se ky brosh do të mbetet në Presidencë si rikujtim i çdoditshëm dhe përmes tij do të jehojë anembanë botës në mënyrën e vet të heshtur, por kumbuese, historia e secilit nga fëmijët./Telegrafi/
