Sot, në Amfiteatrin e Teatrit Kombëtar të Kosovës në Pallatin e Rinisë në Prishtinë, kanë nisur homazhet për aktorin dhe regjisorin e njohur shqiptar, Enver Petrovci, i cili ndërroi jetë ditën e djeshme (e hënë) në moshën 71-vjeçare.
Familjarë, miq, kolegë të skenës dhe të ekranit, si dhe personalitete të politikës dhe kulturës, u mblodhën për t’i dhënë lamtumirën e fundit artistit që la gjurmë të pashlyeshme në artin shqiptar.
Në mesin e të pranishmëve u panë kryetari i Prishtinës, Përparim Rama, kreu i LDK-së, Lumir Abdixhiku si dhe aktorët e njohur Fatmir Spahiu, Kushtrim Sheremeti e Astrit Kabashi.
Petrovci ishte jo vetëm aktor e regjisor i shquar, por edhe pedagog që frymëzoi breza të tërë artistësh të rinj.
Kontributi i tij në artin shqiptar dhe në skenën teatrale mbetet i pazëvendësueshëm.
Homazhet për figurën e tij të madhe vazhdojnë gjatë ditës, duke i dhënë qytetarëve e dashamirësve të artit mundësinë për ta kujtuar dhe nderuar.
Pas homazheve, aktori do të përcillet për në banesën e fundit, në Prishtinë.
Me ndarjen nga jeta të Petrovcit, arti shqiptar humbi një nga emrat më të shquar të skenës, por trashëgimia e tij do të mbetet e pavdekshme. /Telegrafi/