Përfaqësuesja e Islandës po vazhdon të jetë befasia më e bukur e futbollit në vitet e fundit.
Pas suksesit në Kampionatin Evropian të vitit 2016, islandezët e ndalën Argjentinën me një barazim 1-1 në ndeshjen hapëse të Kampionatit Botëror 'Rusia 2018'.
Nëpërmjet një postimit në rrjetin social Twitter, Federata e Futbollit të Islandës, ka njoftuar se 99.6 për qind e njerëzve që ishin duke shikuar televizionin gjatë kohës kur Islanda po luante, ishin duke e ndjekur ndeshjen.
Popullsia e këtij vendi është 337 mijë njerëz, ndërsa fitoren historike ndaj Anglisë në Euro 2016 e kishin shikuar 99.8 për qind e teleshikuesve në Islandë.
Fillimisht në ndeshje shënoi Sergio Aguero në minutën e 19-të, ndërsa Alfred Finnbogason e barazoi rezultatin në minutën e 23-të.
Por, një nga momentet që vazhdon të diskutohet është momenti kur Hannes Halldorsson mbrojti penalltinë e Lionel Messit në minutën e 62-të.
Ndeshja e ardhshme e Islandës në Grupin D është ndaj Nigerisë. /Telegrafi/