Fenerbahçe ka startuar si është më së miri sezonin e ri të Superligës së Turqisë.
"Kanarinat" kanë shënuar fitore të thellë në javën e parë duke triumfuar kundër Gazisehir Gaziantep me rezultat 5-0.
Një prej pesë golave e ka realizuar edhe reprezentuesi i Kosovës, Vedat Muriqi, i cili shfrytëzoi një asistim të mrekullueshëm të kapitenit Emre Belozoglu.
Ky i fundit ka lavdëruar tejet mase sulmuesin prizrenas dhe ka kërkuar që të komentohet më tepër goli i 24-vjeçarit se sa super asitimi i tij.
"Në rend të parë duhet të lavdërohet goli i Muriqit dhe jo pasimi im. Mediat për këtë duhet të flasin. Unë nuk kam bërë pasim të saktë, por Vedati e bëri që të duket super asisitim. Ai është lojtar që të jep besim të madh".
"Ai po e njeh shumë mirë ligën tonë. Edhe sa i përket karakterit, ai po i përshtatet Fenerbahçes. Kohën që e ka humbur Feneri me sulmues, ai do ta përmbush shumë shpejt. Atë e bën të veçantë dhe të afërt me shikuesit edhe fakti se si fëmija ka qenë tifozë i Fenerit. Muriqi është lojtar që ka vlera të mëdha. Ne kishim nevojë për një lojtar si ai", ka pohuar kapiteni i klubit stambollas.
Ndryshe, Muriqi sezonin e kaluar kishte shënuar 17 gola dhe ka bërë tetë asistime gjersa ishte lojtar i Rizesporit. /Telegrafi/
https://www.dailymotion.com/video/x7gpdlk