Komikja e famshme amerikane, Ellen DeGeneres, ka ndarë një histori të dhimbshme të jetës së saj me shpresë që t'i ndihmojë viktimat e tjera.
Në intervistën e saj të fundit për "My Next Guest Needs No Introduction" të David Letterman, ajo ka folur haptazi për nënën e saj, Betty, e cila gjatë kohës kur ishte adoleshente, u martua me një njeri, të cilit nuk ia tregoi emrin.
Sipas Entertainment Tonight, DeGeneres shpjegon se në atë kohë, nëna e saj sapo ishte diagnostikuar me kancer të gjirit dhe kishte hequr një nga gjinjtë e saj, kështu njerku i saj e përdori këtë situatë për ta keqtrajtuar atë seksualisht.
“Kur mami ishte jashtë qytetit ai më tha se mami i ka thënë që kishte ndjerë një gungë në gjoksin e saj dhe kishte nevojë të prekte gjoksin tim. Ai më bindi se duhet të ndjente gjoksin tim dhe u përpoq ta bëjë dhe një herë tjetër, pastaj edhe një herë tjetër”, ka rrëfyer Ellen.
Ajo tregoi se si njerku kishte tentuar t’ia thyente derën dhe se si nuk dëshironte t’i tregonte nënës, për të mos ia shkatërruar lumturinë asaj.
"Është një histori e tmerrshme dhe e vetmja arsye pse unë jam duke shkuar në detaje për këtë, është sepse dua që vajzat e tjera të mos lejojnë kurrë që dikush ta bëjë këtë", thotë ndër tjerash Elllen.
DeGeneres shpreson se historia e saj do të frymëzojë viktima të tjera të sulmit seksual për të vazhduar përpara. "Është koha për ne që të flasim, është koha që ne të kemi fuqi". /Telegrafi/