Danimarka do t'i deportojë emigrantët që dënohen me burg

Danimarka ka njoftuar se do të fillojë një qasje më të ashpër ndaj emigrantëve të dënuar për krime, duke aplikuar automatikisht deportimin e tyre pas vuajtjes së dënimit me burg.

Ky vendim është pjesë e përpjekjeve të qeverisë për të rritur sigurinë publike dhe për të adresuar shqetësimet lidhur me rritjen e kriminalitetit midis grupeve të caktuara të emigrantëve.

Ministrja e Emigracionit, Kaare Bek, deklaroi se "të huajt janë të mbipërfaqësuar në statistikat e krimit dhe shpesh kryejnë krime të rënda, siç janë krimet e bandave. Nuk duhet ta pranojmë një situatë të tillë, sepse kjo dëmton ndjeshëm sigurinë dhe mirëqenien e shoqërisë sonë".

Sipas ministres, qëllimi kryesor i kësaj mase është të mbrohen qytetarët danezë dhe të dërgohet një mesazh i qartë: ata që nuk respektojnë ligjet e vendit nuk janë të mirëpritur.

Ajo theksoi gjithashtu se ky vendim është në përputhje me rregulloret ndërkombëtare dhe standardet e të drejtave të njeriut, por do të zbatohet me një rigorozitet të veçantë për të siguruar zbatimin efektiv të tij.

Politika e re ka ngjallur debate të gjera në opinionin publik dhe në qarqet politike. Disa grupe të të drejtave të njeriut e kanë kritikuar këtë qasje, duke e cilësuar si diskriminuese dhe potencialisht të rrezikshme për integrimin e emigrantëve në shoqërinë daneze. Nga ana tjetër, mbështetësit e masës argumentojnë se ajo është një hap i nevojshëm për të ruajtur rendin dhe sigurinë në vend.

Ky vendim përbën një pikë kthese në politikat e emigracionit të Danimarkës dhe pritet të ndikojë jo vetëm në mënyrën se si trajtohen emigrantët që shkelin ligjin, por edhe në qasjen ndaj emigracionit në përgjithësi. /Telegrafi/