Trajneri Cristian Chivu këmbënguli se është 'i lumtur dhe optimist për të ardhmen' e Interit pas humbjes 2-1 në Ligën e Kampionëve.
Nerazzurrët dominuan për periudha të gjata në Bernabeu, por gjithashtu bënë edhe gabime të kushtueshme që në fund i dhuruan dy gola të hershëm Real Madridit.
Së pari, Curtis Jones me një pasim të gabuar nxiti golin hapës të Kylian Mbappes, pastaj Josep Martinez u kap jashtë loje duke u përpjekur të driblonte Federico Valverde brenda zonës.
Edhe pse Carlos Augusto përfundimisht ia doli të shënonte pas asistimit të Lautaro Martinez, pati pritje të mëdha në të dyja anët nga Thibaut Courtois dhe Josep Martinez për rezultatin përfundimtar 2-1.
“Nuk jam aspak i zemëruar, jam i lumtur me guximin dhe karakterin e treguar nga ekipi im”, ka thënë fillimisht Chivu për Sky Sport Italia.
“Nëse bën gabime, dhe kjo është pjesë e sportit, çështja është se si të reagosh ndaj tyre dhe të ecësh përpara, me gjuhën e trupit, me qëndrimin tënd deri në fund. Do të thoja se ishte një performancë e mirë sonte, duke u përpjekur të dominojmë dhe të mbajmë iniciativën gjatë gjithë kohës”.
“Kjo më bën të lumtur dhe optimist për të ardhmen e këtij ekipi. Gabimet ndodhin, e dinim se do të duhej t’u lejonim diçka në tranzicion dhe cilësinë që kanë në sulm, por qëndruam në lojë deri në fund, treguam karakter dhe ishte një performancë e mirë”.
“Jam krenar që treguam guxim dhe nuk erdhëm këtu duke u përpjekur të luanim për një pikë, por përkundrazi e kontrolluam ndeshjen kundër një skuadre si Real Madridi", përfundoi trajneri i Interit. /Telegrafi/